Nombre total de pages vues

dimanche 24 avril 2011

عسلامة يا توانسة ، محلاكم يا توانسة ، ما أزينكم يا توانسة ، ما أبنكم يا توانسة ،

عسلامة يا توانسة ، محلاكم يا توانسة ،
ما أزينكم يا توانسة ، ما أبنكم يا توانسة ،
كلامي مش للتوانسة الكل ، كلامي هذا للي مسخوا التوانسة !!
أقعدوا لاهين في علماني و إسلامي و خليو التجمع يزحف عليكم من تالي
أحكيو على شراب و نقاب ، بار و خمار ، و حزب الصباب قاعد يحتل في الدار
قولو تونس إسلامية تونس علمانية ، و خليو جماعة التجمع يحتلو الشارع و يربحو القضية
مش مشكل ، القناصة مسيبين ، الفساد مسيبين ، السراق مسبيبين ، المهم تونس لاييك و لا مسلمة

الشعب مسلم ، تونس مسلمة ، الشعب لاييك تونس لاييك واضحة الحكاية ، هوية الدولة تصنعها هوية الشعب ، الي مقتنع بقضيتو ما يخافش عليها .
تناقشو في الهوية متاع تونس ؟ تونس قعدت 1300 سنة مسلمة ، قبل راشد الغنوشي و قبل حمة الهمامي ، قبل بسايكو آم و قبل سوسن معالج ! تونس ملي أسست القيروان و هي مسلمة ، تعدات بظروف أكبر من هاذي ببرشة و قعدت مسلمة ! مسلمة !! حتى الدستور القديم الي ماكلو السوس قال راو تونس مسلمة .
تونس مسلمة بإسلام شعبها ، اللهم جابو شعب آخر و بدلو الشعب التونسي و آنا ما في باليش ! هاذي نقطة تفاهمنا فيها باهي .
يبقى إنها تتبنى نظام إسلامي أو علماني هي المسألة الأولى بالنقاش ، أما صدقوني كان رجعو إحتلوكم التجمعيين لاكم باش تعملو نظام إسلامي و لا نظام علماني ، ماكم باش تعملو شيء و باش ترجعو كيما كنتو قبل ، فرايجية و بڨرالله في زرع الله ، باش تعملو أكبر بهامة صارت في القرن الواحد والعشرين ، باش تعملو بآآآآآآآآآآع !!!!
التجمع تحل ، متفاهمين ! آما زعمة التجمعيين تحلو ؟ يحلهم ربي إن شاء الله !! التجمعيين مازالو يحوسو عادي ، لا مش يحوسو عادي برك ! تي عاملين مظاهرات زادة و قلك: نهدد بحمام دم كان ما ترجعوناش لبلايصنا !!
صحة يا تونسي ، صحة صحة ههههه ، صحة يا تونسي يالي قهروك ، لووول ، يالي غبنوك ، هههه يالي بهموك !!! يلي قوْلوك في حيحون و قدام العرب الكل فضحوك !! عيش الحرية ، المجد للبهامة التونسية ، لقد هرمنا هرمنا من أجل هذه البهامة التارىخية !
والله صدق هاكا الراجل الي قال نعانيو من كم كبير متاع بهامة !!
أقعدو إتهاردو إنتوما ، يا علماني يا إسلامي يا خوانجي يا ملحد !! أقعدوا إتهاردو !!
عندي سؤال في خضم هذه اللحظة التاريخية الي هرمنا هرمنا من أجلها !
توه بهامتك إنت مسؤول عليها ، أما آش ذنبو ولدك يتربى في ظل نتائج بهامتك كيما ما تربينا أحنا في نتائج الخوف متاع والدينا ؟؟ مستعد تتحمل مسؤولية إفشال الثورة ؟؟
زعام كان في هرمنا هرمنا ؟؟؟ و في تقشقيش لحناك الزايد ؟؟
بربي وقت خرجت تعيط ديڨاج ، هذا كان خرجت أصلا ، ثبت مليح في اللي يصيحو معاك ؟؟ يطلعشي واحد فيهم ملحد ولا خوانجي ؟؟ تي ماو صحنا الكل مع بعضنا : ديڨاج يا خماج و قتها الخماج متأكدين الي هوما موش بيناتنا !!! مقابلينا !!! توة ولينا نتهمو في بعضنا إلي أحنا خماج ؟؟ شيهمك فيه خوانجي ولا ملحد ؟؟؟ تي ماو تونسي كيفك !!! شيهمك في والدين أصل بوه إنت يصلي و لا يشرب ؟؟ كان صلى راو إل روحو و كان شرب راو إل روحو !! مسيبين الراس وشادين في الشعر ... زايد هاو علاش اللي يجي يحكمنا يوطن لين يصدد ! من بورڨيبة إل بن علي و الي جاي بعدو !!
مادام عقلية التونسي هكة ، عمرو ما يتحرر !!!
وقت التونسية يتحرر مالعقلية الرجعية متاعو بإسلاميتها بعلمانيتها !!
وقتها ينجم يتحرر !!

دجو الي قاعد يعمل في الفازة متاع هرمنا و يمسح على شعرو و يضحك مالهم
hakai9 khfiya

Aucun commentaire:

Enregistrer un commentaire