تحية اكبار و اجلال لجيشنا التونسي الابي حامي حمى الوطن

تحية اكبار و اجلال لجيشنا التونسي الابي حامي حمى الوطن

يا توانسة يا باهيين راهو فمة حملة كبيرة عالفايسبوك قاعدة تشكك في الجيش التونسي والغرض منها هو الايقاع بين الشعب و الجيش اللي المهمة متاعو تكمن في حماية البلاد والعباد

لازمنا الكل نتصداو لهالحملة الرخيصة اللي قاعدين يعملو فيها برشة اعضاء (فو بروفيل) و هوما تجمعيين سابقين موش عاجبهم انو تونس قاعدة تتقدم شيئا فشيئا نحو الديمقراطية والحرية ويحبو يحسسو الشعب التونسي اللي من غيرهم هوما البلاد داخلة في حيط

والله صدقوني يا جماعة اليوم كيف قريت البيان اللي اصدرتو القوات المسلحة التونسية واللي عبرت فيها عن اسفها للحملة اللي قاعدة تتشن ضدها عالفايسبوك صدقوني حشمت على روحي كيف يوصل الجيش التونسي يجاوب عالحملات المغرضة اللي قاعدة تتشن ضدو

يا توانسة يا باهيين ياخي نسيتو شكون اللي حمانا وقت اللي ميليشيات بن علي يهاجمو فينا ويرهبو فينا

ياخي نسيتو شكون اللي حمى البلاد في الوقت الصعيب هاكة والى حد الان مازال على نفس النسق وحتى الجنود مازالو ما ارتاحوش ويعلم بيهم ربي شنية الضروف اللي قاساوها طوال هالفترة في الوقت اللي احنا هانيين في ديارنا ناكلو ونشربو ونرقدو متغطيين في الدفاء

ياخي ما شفتوش الجهود الجبارة اللي قاعد يقوم بيها الجيش متاعنا في الحدود التونسية الليبية

كل تونسي ما يدافعش عالجيش التونسي هو عبارة لا يدافع على بلده وكل تونسي يسمح بان يهان الجيش التونسي هو عبارة يسمح باهانة بوه والا امه وما يدافعش عليهم

لذا نحبو الناس الكل ما يشكوش ولو للحظة في نزاهة ووطنية و صدق جيشنا الوطني اللي قاعد يحمي في تونس من العديد من الاخطار المحدقة بنا

لازمنا كلنا يد واحدة نتصداو لهالحملة المغرضة واي انسان تلقاوه عامل (فو بروفيل) وقاعد يبث في الفتن ويشوه في صورة الجيش التونسي سينياليوه الكل و ما تسكتولوش وتوة نقضيو عليهم الكل باذن الله تعالى

مالمفروض نعاونو الجيش متاعنا ونقدمولو يد المساعدة باش يخدم مرتاح موش نوصلو نخليوه يعمل بيان على الحملة اللي قاعدة تحاك ضدو عالفايسبوك والله شيئ يحشم شيئ يحشم وعيب علينا

و من توة لازمنا نبينو للجيش متاعنا اللي احنا نحبوه كيما قبل واللي الحملات هاذي يعملو فيها مندسين تجمعيين الغرض متاعهم الايقاع بين المواطن التونسي وبين الجيش التونسي الابي

عاشت تونس وعاش الشعب التونسي وعاش الجيش التونسي حامي هذا الوطن-

Tunisia _ تونس _ Tunisie