قناة نقمة والسفسطة

قناة نقمة والسفسطة

يا جماعة فمة برنامج اسمو "ممنوع على الرجال" كان سمعتو بيه يجيبو فيه على قناة نسمة...نفهمو مالعنوان انو البرنامج ليس فيه رجال اما الغريب انو البرنامج هذا فيه راجل برك اسمو جمال العرفاوي

السيد هذا ما لقيناه فالح كان في الدفاع على حرية المراة و مجلة الاحوال الشخصية للمراة التونسية و قبل الثورة يتملق لجماعة التجمع و يحرض فيهم على مغني متاع راب خاطرو يغني و يدافع عالاسلام

ياخي بربي نساء تونس عطاوه توكيل باش يدافع على حريتهم والا شنية حكايتو هذا

والله سخفني حال المرءة التونسية عاملينها كيف هاكة الجحيش الصغير اللي يركبو عليه الفراطس الكل متاع هالبلاد

اولهم بن علي اللي اوهم العالم الكل انو محرر المراة من العبودية والاستغلال و القمع

باش يقوللهم راهي تونس ديمقراطية والدليل انو المراة التونسية حرة و حقوقها مضمونة في تونس وكيف البلدان الغربية اطمانو على مصير تونس خلاولو اللعب وهو بالطبيعة قمع الشعب الكل وعمل فيه شر المهالك و سرقنا كيف ما حب باسم حرية المراة و الديمقراطية ومكافحة الارهاب والتطرف

وتوة قناة نسمة قاعدة تستغل في المراة التونسية وتميع فيها لاقصى درجة باش تبين للعباد انو المراة التونسية حرة ولازمها تقعد ديما حرة و القناة هاذي تستعمل في السيد جميلة العرفاوي عفوا جمال العرفاوي وامثالو باش زعمة زعمة يدافعو على المراة التونسية ويخوفوها مالمصير المجهول اللي ممكن تتعرضلو باسم فزاعة الاسلاميين ههههه

وللاسف فمة برشة نساء في تونس انطلت عليهم الحيلة هاذي وهوما بيدهم ولاو خايفين على مصيرهم و ولاو يخدمو في المشروع اللائيكي المتطرف المعادي للاسلام اللي تبث فيه قناة نسمة 24 ساعة على 24 ساعة

يا نساء تونس وبناتها راهو ماعندكم مناش تخافو

ما تخافوش على مستقبلكم و مصيركم خاطر الشعب التونسي هو اللي باش يحميكم و حقوقكم الكل محفوظة و مجلة الاحوال الشخصية محفوظة و ما يمسها حتى واحد

اما بربي ما تخليوش الصحافيين المتطرفين و المشبوهين امثال جميلة العرفاوي او غيرو اللي يخدمو لصالح اجندات خفية يستغلوكم كبيدق لتمرير عداوتهم للاسلام

بن علي استغلكم طيلة 23 سنة كاملة وميع صورتكم كيما حب واشتهى وتوة زادة فمة مشروع كبير قاعدين يخدمو عليه باسمكم

بربي اخرجو مالصمت متاعكم واتكلمو على حقكم وما تخليوش هالانتهازيين يحكيو باسمكم و يخليوكم لعبة سياسية بين ايديهم باش يوصلو لاهدافهم السياسية المشبوهة

فيقو يا نساء تونس و اخرجو من صمتكم ودافعو على رواحكم

Tunisia _ تونس _ Tunisie